Good Bye

އަޅެ އަހަރެން ދޫކޮށް ދިޔައީހެއްޔެވެ......؟

ވަރަށް ދެރަވެ ފެންކަޅިވެއްޖެއެވެ.

ގުޑާލަންވެސް ނޭނގި ބަލަހައްޓައިގެން ހުރެވުނު އިރެއްވެސް ނޭނގެއެވެ.

ތިބާ އަހަންނާއި ވަކިވެގެން ދިޔައީހެއްޔެވެ؟

މާދަމާގެ ޢީދުގައިވެސް ބައިވެރިނުވެ ދިޔައީހެއްޔެވެ؟

އަޅެ ތިބާއާއި ނުލައި އަހަރެން ދެން އުޅޭނީވެސް ކިހިނެއް ހެއްޔެވެ.؟

އެކުގައި 6 އަހަރު ހޭދަކުރީ ހާދަ ހިތްހަމަޖެހިގެންނެވެ.

އެންމެ އެކަނިވެރިވަގުތުގައިވެސް، އެންމެ ހިތްދަތި ވަގުތުގައިވެސް،

އެއްވެސް އެހީއެއް ވާނެ ފަރާތެއް ނެތް ވަގުތުތަކުގައިވެސް،

އެންމެ އުފާވެރި ވަގުތުގައިވެސް، އެންމެ ޚާއްޞަ ވަގުތުތަކުގައިވެސް

މިހޭދަވި 6 އަހަރު ހޭދަކުރެވުނީ ތިބާ އާއިއެކުގައެވެ.

ތިބާ ނޫން ބައިވެރިއަކު ނުގެންގުޅެމެވެ.

ތިބާ ވަނީ އަހަރެންގެ ވަރަށް ޚާއްޞަ ރަޙްމަތްތެރިންނާއި ގާތް މީހުންނަށްވެސް ތަޢާރަފްވެ ދަސްވެފައެވެ.

ތިބާއާއި ބައްދަލުވުމަކީ އެމީހުންނަށްވެސް ލިބުނު ޝަރަފެކެވެ.

ތިބާއަކީ ޚާއްޞަ ބައިވެރިއެކެވެ.

ތިބާއާއި ނުލައި އަހަންނަށް ދެން އުޅެން އެނގޭނެހެއްޔެވެ؟

ތިޔަފަދަ ރީތި ސިފައެއް ލިބިގެންވާ އެހެން ފަރާތެއް ދެން އަހަންނާއި ދިމާވާނެހެއްޔެވެ؟

އަޅެ އަހަންނަށް ފަހަތަށް ނުޖެހެވުނު ނަމައެވެ.

ޖެހުމުގެ ކުރިން ބަލާލެވުނު ނަމައެވެ.

މިފާއިތުވިހާ ދުވަހު ތިބާ އަރިއަޅާލަފާނެ ކަމެއްވެސް ވިޔަނުދޭން ފަރުވާތެރިވީމެވެ.

އެކަމަކު ހަމަ އެންމެ އިހުމާލަކުން އަހަންނާއި ތިބާގެ ގުޅުން އުމުރަށް ނިމުނީއެވެ.

އަހަންނަށް މަޢާފް ކުރައްޗެވެ.

ވެއްޓި ޖެހުނު ބާރުއަޑަށް އަހަންނަށް އެނބުރެވުނުއިރުވެސް މާ ލަސް ވެއްޖެއެވެ.

ބިންމަތީގަ ޖެހުމާއެކު ތިބާއާއި އަހަރެންގެ ގުޅުން އުމުރަށް ކަފުން ކުރަން ޖެހުނީއެވެ.

ސައްތައިން ސައްތަ އަހަރެންގެ ކުށެވެ.

އަހަންނަށް މަޢާފް ކުރައްޗެވެ.

ޤަބޫލުކުރާށެވެ. ތިބާއަށް ދިން މަޤާމެއް މި ހިތުން އެހެން އެއްވެސް ފަރާތަކަށް ނުދެވޭނެއެވެ.

ތިބާއަކީ އަބަދުވެސް މި ހިތުގެ ވަރަށް ގާތް ބައިވެރިއެކެވެ.

އެކުގައި އުޅުނުއިރު ވީފަދައިން ނެތް ތަނުގައިވެސް ލޯބިވާނަމެވެ.

ވެވޭނެއެވެ.

ތިބާއަކީ ލާމަސީލު ނަމޫނާއެކެވެ.

ރީތި ސިފައެއް ލިބިގެންވާ ޝާހީ ބައިވެރިއެކެވެ.

ހަނދާނެއްގެ ގޮތުން އެކުގައި ދެތިން ފޮޓޯއެއް ނެގިފައިހުރިކަމަށްޓަކައި މިއަދު އުފާކުރަމެވެ.

އަހަރެންގެ ގާތް މީހުންނަށް ތިބާގެ ވާހަކަ ކިޔައިދޭނަމެވެ.

ޖީލުތަކަށް ދެމިގެންދާ ވާހަކައަކަށް އެ ވާހަކަތައް ވާނެއެވެ.

އެހާވެސް ތިބާ ޚާއްޞައެވެ.

އަލްވަދާޢު އެވެ.

އެހެނަސް ދެރަވެ ރޮވިފައެވެ.

ނިމުމެއް ނެތް ލޯތްބަކާއެކުގައެވެ.

--------------------------(ލިޔުނީ: ފަތިސްތަރި / 1 ޝައްވާލް 1433 ) --------------------------------

Naai ge handhaanugai

މި ފޮޓޯ އަކީ ނާއީގެ ބަނޑެއްގައި ރިއްސާތީ، ޑޮކްޓަރަށް ދެއްކުމަށްޓަކައި ނާއީގޮވައިގެން ނާއީގެ މަންމަ އާއި ބައްޕަ އިންޑިޔާއަށް ފުރި ދުވަހު އެއަރޕޯރޓްގައި ނަގާފައިވާ ފޮޓޯއެކެވެ.

ހިތާމައަކީ، ބައްޔެއްގެ މާ ބޮޑު އަސަރެއް ނެތި، އުފަލުން ހީ ސަކަރާތްޖަހަމުން، މަޖާވެފައި ހުރެގެން ފުރައިގެން ދިޔަ އެ ކުޑަ ކުއްޖާގެ ޓެސްޓްތަކުން ހީވެސް ނުކުރާ ކަހަލަ ނަތީޖާތައް ފެނި، ނާއީގެ ބަނޑުގައި ރިއްސި އެ ރިހުން އެއީ ނާއީގެ މަރު ބައްޔަށް ވެގެން ދިޔަކަމެވެ.

ހައްދަވާ ބޮޑުކުރެއްވި ރަސްކަލާކޮ. ނާއީގެ ލޮބުވެތި ފުރާނައަށް ސުވަރުގޭގެ ދާއިމީ ނިޢުމަތް މިންވަރު ކުރައްވާށި.

އޯގާވަންތަ ރަސްކަލާކޮ. ފުރިހަމަ އެއް އަހަރުވަންދެން ނާއީއަށް އުފުލަން ޖެހުނުފަދަ ވޭނާއި ކެކުޅުން މި ދުނިޔޭގެ އެއްވެސް މަންމައެއްގެ ކުޑަކުއްޖަކަށް އަދި އެއްވެސް ބޮޑުމީހަކަށްވެސް ނުޖައްސަވާށި.

އެންމެ މޮޅަށް ދެނެވޮޑިގެންވާ ރަސްކަލާކޮ. އަޅަމެންނަކީ މިންވަރަށް އީމާންވާ، އިބަރަސްކަލާނގެ ނިންމެވުމާއި ދޭތެރޭ ޝަކުވާ ނުކުރާ، ހިތާމައާއި ހިތްދަތިކަމަކީ ޢިބްރަތެއްކަމުގައި ބަލައިގަންނަން އެނގޭ ބައެއް ކަމުގައި ލައްވާށި. އާމީން.

އެއްކައުވަންތަ ރަސްކަލާކޮ. އަޅަމެންގެ ވެރިފަރާތަކީ އިބަ އިލާހެވެ. އަޅަމެން ރުޖޫޢަ ވާހުށީވެސް އިބަރަސްކަލާނގެ ހަޟްރަތަށެވެ. 

------------------(ލިޔުނީ ނާއީ ދެކެ އިންތިހާއަށް ލޯބިވާ ނާއީގެ ސޮފައްތަ)---------------------

                         25 ޖުލައި 2012

Heekuree Heyyeve

އޭނަ ހީކުރިއެވެ.

އަހަރެން ރޯނެއެވެ. ކަރުނަ އޮހޮރާނެއެވެ. ހަމަ އެކަނި ބެދޭނީ އަޑެއް ނޫނެވެ. ނޭވާ ހިނގާ ހޮޅިތަކާއި ލޭ ހިނގާ ނާރުތައްވެސް ބެދޭނެއެވެ. ނުވަތަ އަހަރެން އަމިއްލައަށް މަރުވާނެއެވެ.

އެއީ ހީވާ ގޮތެކެވެ.

އަހަންނެއް ނުރޯނަމެވެ. ކެހިވެރިޔަކަށްޓަކައި އެންމެ ކަރުނަތިއްކެއްވެސް ބޭކާރެއް ނުކުރާނަމެވެ. އަހަރެން ހަށިގަނޑުގައި ވަރު އެބަހުއްޓެވެ. އޭނަ ހީކުރިވަރަށްވުރެ އަހަރެންގެ ހިތްވަރު ގަދަ ވާނެއެވެ. ވަރުގަދައީ އޭނަކަމުގައި ހީކުރުން އެއީ އޭނައަށް ކުރެވުނު ކުށް ހީއެކެވެ. ތިމާއަށް ތިމާ ފެނިފަ ހުރުމުން އެރި އޮޅުމެކެވެ.

Lobivaaa Ekuveriyaa...Hinithunvelaa

ލޯބިވާ އެކުވެރިޔާއެވެ.

އާ ދުވަހަކަށް އިރު އަރައިފިއެވެ. ލޯހުޅުވާލާށެވެ.

މިއަދު މިއީ އެ ޚާއްޞަ ދުވަހެވެ.

ވަގުތަކީ ގިނަ ފަހަރު އިޢުލާންކުރުމަކާ ނުލާ އަންނަ އެއްޗެއް ކަމަށްވިޔަސް،

މިއަދުގެ މިވަގުތު އަންނާނެކަން އެކުވެރިޔާއަށް އޮތީ އެނގިފަ ނޫންހެއްޔެވެ.

އެއީ ނަސީބު ކަމުގައި ދެކޭށެވެ.

ހިނިތުންވެލާށެވެ.

Hageegee Kula

ޙަޔާތުގެ ކޮންމެ ޞަފްޙާއަކީވެސް ޢިބްރަތެކެވެ.

ކޮންމެ ވާހަކައަކީވެސް ކޮންމެވެސް އަޞްލެކެވެ.

އިންސާނާ ގުނާ ކޮންމެ ހިނދުކޮޅަކީ ފިލާވަޅެކެވެ.

ކިޔާމީހާއެވެ. ޢިބްރަތެއް ލިބިގަންނާށެވެ.

ބައެއް އިހްސާސްތައް ފަހުމްވުމުން ކިހާ ވޭން ދޭހެއްޔެވެ.

އުމުރުގެ ފަހަތަށް ދިއުމުން ފަސް އެނބުރި ބަލާލާށެވެ.

އެހެން މީހުންގެ ދިރިއުޅުމަށް ބަދަލެއް ގެނެވިފައި އެބަވޭތޯއެވެ.

ކިޔާމީހާއެވެ. ޢިބްރަތެއް ލިބިގަންނާށެވެ.